Doesburg Doezebarg

Doezebarg is een stad (Hanzestad) en gemeente in de Nederlaandse pervinsie Gelderlaand. De stad is elegen langes de Gelderse Iessel en de Olde Iessel. De gemeente Doezebarg maakt deel uut van 't kaderwetgebied Knooppunt Arnem-Nijmegen.

Geschiedenis
Doezebarg kreeg stadsrechten in 1237, een jaor laoter as Deutekem. Deur de strategische ligging an de munding van de Olde Iessel en de Gelderse Iessel, is Doezebarg lange tied een belangrieke vestingstad ewest. Ok had Doezebarg een belangriek economische en bestuurlijke functie. Deur alderlei oorzaken, waoronder de verzaanding van de Iessel, nam de welvaort in Doezebarg nao de 15e eeuw of. Doezebarg veraanderde in een slaperig pervinsiestädtien en zol dät tot nao de oorlog blieven. Dit had ok zien veurdelen, de historische binnenstad mit zien veule monumenten bleef goed beweerd. De stad wönnen daorumme in 1974 as bescharmd stadsgezich an-ewezen.

Umdät Doezebarg tot 1923 officieel een vestingstad was, was stadsuutbreiding niet meugelijk. Nao de Tweede Wereldoorlog wönnen de stad gauw uut-ebreid. In de jaoren '50 wönnen an de oostkaante van de stad de wiek Meuleveld ebouwd. In de jaoren zestig volgde de wiek De Ooi. In 't zujen van de Olde Iessel volgden in de jaoren '70 en '80 de wiek Beinum, kortens is in 't zujen van Beinum de wiek Campstede ebouwd.