Dinxperlo Dinsper of Dinxper

Dinsper of Dinxper is een darp in de previnsie Gelderland in Nederland.

Tot 1 januari 2005 was Dinsper een zelfstandige gemeente waor de buurtschap De Heurne ok onder viel. Met de gemeenteleke herindeling wodden Dinsper bi-j de gemeente Aalten evoegd, waor 95% van de Dinspersen tegen was.

Geschiedenis
In 1260 wodden Dinsper veur t eerst enuumd. An te nemmen dat al eeuwen veur dèn tied boerderi-jen waren ebouwd op de hoge grond van t darp naor het noordoosten. In de 14e eeuw wodden Dinsper deel van de heerlekheid Breevoort. Umdat Dinsper beheurlik riek was wodden ut in 1260 meugelek ne parochiekarke te bouwen op de plaatse waor now de darpskarke steet. Nao den Tweede Wereldoorlog wodden disse karke helemaol restaureerd. Dinsper wodden in 1945 bi-jna helemaol verwoest, umdat t op de grenze van Nederland en Duutsland ligt.


Samen met t darp Zoerik (Duuts: Suderwick) in Duutsland vormt Dinsper in feite één darp. Op de Anholtseweg, Healweg en Keuperstraot ligt de landsgrenze. Zudelek van disse straoten is Duutsland en noordelek Nederland. In de 1e wereldoorlog wodden disse straoten deur een hek in twee-en esplitst, zodat Duutse vluchtelingen het neutrale Nederlandse Dinsper niet in konnen. Vrogger is der in Dinsper völle esmokkeld. Een beeldengroep van een smokkelaar en een kommies op de grenze herinnert daor no nog an.

Tegenswoordigs is met de komst van de Europese Unie vri-je handel meugelek tussen de lidstaten. De Dinspersen gaot benzine tanken an de aoverkante van de straote en de Zoeriksen koopt eure koffie an de Nederlandse kante. In beide darpen wordt t zelfde dialekt epraot: achterhooks met een bitjen Duuts accent. Een bekend sprekwoord in den Achterhook is dan ok: "In Dinxpèr is allès annès, de sukèr te zute en de zalt te zalte".

De vri-jwillige brandweer en de politie van beide darpen warkt heel nauw samen. T politiebureau an de Raodhuusstraote hef dan ok de woorden "Politie" en "Polizei" met de bi-jbeheurende emblemen van de Nederlandse en Duutse politie op den lufel staon. Agenten uut beide landen warkt in dit buro.